Nasim Rahman

ഉറങ്ങെൻ കുഞ്ഞി- രുൾ കണ്ണടക്കും വരെ ഓരോ കഥ ചൊല്ലിയുമ്മ അരികിലിരിക്കയല്ലേ… തുറിച്ച കണ്ണടക്ക് വെയിലുദിച്ചതല്ല അപ്പുറത്തുള്ളോർ മിസൈലാൽ കളിക്കയല്ലേ. ഞെട്ടല്ലേ, ഇരുകയ്യാൽ ചെവി പൊത്താം ഞാൻ തലച്ചോറിൻ പൂത്തിരിക്കവർ ചിരിക്കയല്ലേ. കതകിലാരോ മുട്ടുന്നെന്നുണർന്നിടല്ലേ ബോംബു തെറിപ്പിച്ചൊരു കൈ വന്നെന്നറിയിപ്പല്ലേ… വിളിക്കുന്നുണ്ടുറപ്പായും നിന്നെയാവില്ലാ കളിക്കുട്ടികളാരാരുമിവിടെയുറങ്ങാതില്ലാ… ഉറങ്ങെൻ കുഞ്ഞവരും കൺതുറക്കും വരെ, ചിതറിയ മുത്തുകളായ് ചിരിക്കും വരെ. ഉറങ്ങെൻ കുഞ്ഞുണരാ- നിവിടൊന്നുമില്ല, ചെറുചൂടുറവായിട്ടുമ്മ നിന്നുടെ അരികിലില്ലേ… ഉപ്പയവിടെ നിനക്കായ്‌ കളിവീടു കെട്ടുന്നു, വെയിലത്തും കളിക്കാൻ മൺകുട നിവർത്തുന്നു …

പിറകിൽ തിളക്കുന്ന, ചോര തെറിക്കുന്ന ഹൃദയമുള്ള മാർവിടങ്ങളെല്ലാം ഫലസ്ത്വീനിലേക്ക് പാൽ ചുരത്തുന്നു. പൊട്ടിച്ചിതറിയ വെളിച്ചത്തിൽ കാത്തുനിൽക്കാതെ ഇളംകാലുകൾ ഇരുട്ടിലേക്കോടി മറയുന്നു. കാഴ്ച തെറിച്ചോരു കുഞ്ഞിക്കണ്ണ്‌ പാൽ നുണയാൻ കുഞ്ഞുവായ് കൂട്ടിയിട്ട കൂട്ടുകാർക്കിടയിൽ തപ്പി നടക്കുന്നു. കൂട്ടം തെറ്റി പറന്നു പോയൊരു കുഞ്ഞിക്കയ്യ്‌ ചോര പൊതിർത്തിയ മൺകട്ടകളിലെല്ലാം തനിക്കായ് ചുരത്തുന്നൊ- രമ്മിഞ്ഞ തിരയുന്നു. ഒഴിഞ്ഞ കുഞ്ഞുവയറുകൾ ഓടാനൊരു കാൽ കിട്ടാതെ ആർത്തുകരയാനൊരു ശബ്ദത്തിനായ് പുളയുന്നു. പാൽ പുഞ്ചിരികൾ വറ്റിക്കിടക്കുന്നു കൊഞ്ചലുകൾ ചിറകറ്റു തേങ്ങുന്നു ഗർഭപാത്രങ്ങൾ, പാൽകുടങ്ങൾ ഒഴിഞ്ഞും നിറഞ്ഞും

റമദാനിന്നമ്പിളിമുഖമംബരത്തില്‍ വന്നുദിച്ചു റഹ്മത്തിന്നൊളി ഖുര്‍ആന്‍ മാസമിതാ തമ്പടിച്ചു പരകോടി മുഅ്മിനുകള്‍ ഹൃദയപൂര്‍വം സ്വീകരിച്ചു ഇരുലോകപാലകന്‍റെ പ്രീതിയവര്‍ ആഗ്രഹിച്ചു കാരുണ്യത്തിന്നലകള്‍ ലോകമെങ്ങുമലയടിച്ചു കറനിറഞ്ഞ ഹൃദയതലം തൗബജലത്താല്‍ തുടച്ചു ഗതവ്രതങ്ങളഹദവനേ, സ്വീകരിക്കണേ, നിനച്ചു വ്രതദിനങ്ങളാകെയവര്‍ നന്മകൊണ്ടലങ്കരിച്ചു ദിക്റിനാല്‍ ദുആകളാല്‍ സകലരും ചുണ്ടുനനച്ചു ദാനധര്‍മ്മകര്‍മ്മമാല്‍ സ്വജീവിതത്തിലൊളി നിറച്ചു പ്രഭവിതറും ഖുര്‍ആനിനെ സകലരും തുറന്നുവെച്ചു പകലിരവില്‍ അതിലെ വചനമോതി പ്രതിഫലം കൊതിച്ചു ഹൃദയവനിയിലാകെ തഖ് വ പുതുമുകളങ്ങള്‍ വിരിച്ചു അഹദവന്‍റെ സ്മരണകളാല്‍ തരളിതം; മനം തുടിച്ചു ഇരുകങ്ങളുയരുകയാണഖിലനാഥനെ സ്മരിച്ച് സ്വര്‍ഗഭവനമരുളുവാനെന്‍ വ്രതദിനങ്ങള്‍ സ്വീകരിച്ച്

പി പി ഇ കിറ്റ് ധരിച്ചു പുറത്തിറങ്ങിനോക്കി ഇന്നൊന്ന് നീതി. കണ്ണുകെട്ടാറുള്ള തുണിയോടു നീതിയായ് കറുത്ത പി പി ഇ കിറ്റ്. കൂർത്ത നോട്ടങ്ങൾ ബുർഖയെ ഓർമിപ്പിച്ചപ്പോൾ സി എ എ ഓർമവന്നു. കഴുത്തിന് മുകളിലുള്ളതെല്ലാം ഊരിയെറിഞ്ഞു മതേതരനായി തലയുയർത്തി നടക്കുമ്പോൾ മാസ്ക്കിടാതെ നടക്കുന്ന അനീതി പിറകിലൂടെ വന്ന് മാസ്‌ക്കെവിടെയെന്നൊരടി! നീതി ഓടി, കിതച്ച് ശ്വാസം കിട്ടാൻ ക്യൂവിലായി. ശ്വാസം കിട്ടാതെ നീലിച്ച നീതി മാറിയ നിറത്തിന്റെ ചേലാൽ സവർണ വരികൾക്കു തീണ്ടാപാടകലെ അവർണ വരിയിൽ നിന്ന്